सर्वसाधारणतः उपवासाच्या पदार्थांची यादी साबुदाणा खिचडी, थालीपीठ, राजगिरा लाडू या पलीकडे सहसा जात नाही. या सर्वांपेक्षा वेगळ्या असलेल्या वरीच्या तांदळाची खांडवीची रेसिपी आपण ‘पौष्टिक डब्याची चविष्ट रेसिपी’ या सदरात या वेळी पाहणार आहोत. ...................
उपवास असेल तर त्या दिवशी उपवासाचे आणि नेहमीचे असे दोन प्रकारचे पदार्थ करावे लागतात. असे करणे फारच घाई-गडबडीचे होते. त्यामुळे नोकरी करणाऱ्या स्त्रियांची तर फारच धांदल उडते. अशा वेळी मुलांच्या डब्याला उपवासाचा एखादा पदार्थ दिल्यास सकाळच्या धावपळीतून थोडी सुटका मिळते. सर्वसाधारणतः उपवासाच्या पदार्थांची यादी साबुदाणा खिचडी, थालीपीठ, राजगिरा लाडू या पलीकडे जात नाही. म्हणूनच या सर्वांपेक्षा वेगळ्या असलेल्या वरीच्या तांदळाच्या खांडवीची रेसिपी आपण या वेळी पाहणार आहोत.
वरीचे तांदूळ पचायला हलके असतात. शिवाय तो कॅल्शियमचा उत्तम स्रोत आहे. शिवाय हा पदार्थ करायला सोपा आणि आवडण्यासारखा आहे. त्यामुळे तो नक्की करून पाहा. या पदार्थामधून भरपूर कॅल्शियम, लोह, प्रथिने इत्यादी घटक शरीराला मिळतील.
साहित्य :
वरीचे तांदूळ - एक वाटी, खोवलेले खोबरे - अर्धी वाटी, साखर - एक वाटी, सुका मेवा - आवडीनुसार, वेलदोडे - दोन, साजूक तूप - तीन चमचे
कृती :
- सर्वप्रथम वरीचे तांदूळ स्वच्छ धुऊन घ्या.
- दोन चमचे साजूक तुपात हे तांदूळ छान परतून घ्या.
- त्यात गरम पाणी घालून ते मोकळेच शिजवून घ्या. झाकण ठेवू नका.
- नंतर त्यात साखर घालून नीट मिसळून घ्या व थोडे गरम करा.
- हे मिश्रण व्यवस्थित मिसळल्यानंतर त्यात खोबरे घालून परत हलवा.
- एकसारखे मिश्रण तयार झाल्यावर त्यात वेलदोडे घाला.
- एका ताटाला तूप लावून या मिश्रणाच्या वड्या थापा.
- वरून सुका मेवा व थोडे ओले खोबरे घालून सजावट करा. या वड्या चौकोनी किंवा आडव्या आकारात कापून घ्या.
- या वड्या श्रीखंडाच्या किंवा खांडवीच्या वड्यांप्रमाणे घट्ट नसतात. थोड्या मऊ असतात; पण त्यांना आकार देता येऊ शकतो.
- आश्लेषा भागवत
ई-मेल : ashlesha0605@gmail.com
(लेखिका पुण्यातील आहारतज्ज्ञ आहेत.)
